بۇگىن ورتالىق كوممۋنيكاتسيالار قىزمەتىندە اقپارات جانە كوممۋنيكاتسيالار ۆيتسە-ءمينيسترى نۇرگۇل ماۋبەرلينوۆا جانە قازاقستانداعى فرانتسيانىڭ توتەنشە جانە وكىلەتتى ەلشىسى فيليپپ مارتينەنىڭ قاتىسۋىمەن «تسيفرلىق كۇز - 2018» اتتى مادەني ماۋسىمنىڭ باستالۋىنا وراي ءباسپاسوز ءماسليحاتى ءوتتى.
فرانتسيا ەلشىلىگى مەن ونىڭ سەرىكتەستەرىنىڭ ۇيىمداستىرۋمەن وتەتىن مادەني شارالار حالىقتى ونەرتابىسقا, كاسىپكەرلىككە باۋلۋعا باعىتتالعان. بيىلعى شارا تەxنولوگيالىق ءارى يننوۆاتسيالىق تاقىرىپقا ارنالۋىنا بايلانىستى استانا مەن الماتى وتەتىن بارلىق مادەني شارالار وزىق تەxنولوگيالاردىڭ نەگىزىندە ۇيىمداستىرىلادى. فيليپپ مارتينەنىڭ ايتۋىنشا, «تسيفرلىق كۇزدى» وتكىزۋ كەزىندە قازاقستاننىڭ تسيفرلىق تەxنولوگيالارعا قاتىستى قازىرگى ۇستانىمى بارىنشا ەسكەرىلەدى. وسىعان بايلانىستى شەتەل ارتىستەرى يننوۆاتسيالىق ءادىس-تاسىلدەردى جان-جاقتى قولدانادى. ال مادەني شارالاردىڭ باسىم بولىگى ۆيرتۋالدى تۇردە كورسەتىلىپ, قاتىسۋشىلار ينتەراكتيۆتى كونتسەرت تىڭداۋعا مۇمكىندىك الادى.
سونداي-اق ەلشىنىڭ ايتۋىنشا, فرانتسيا ەلىندە دە «تسيفرلىق فرانتسيا» دەگەن باعدارلاما جۇزەگە اسۋدا. «باعدارلاما اياسىندا ەلىمىزدە 2022 جىلعا دەيىن بارلىق اكىمشىلىك شارالاردى ەلەكتروندى فورماتقا اۋىستىرۋ كوزدەلگەن. ماۋسىم بارىسىندا وسى سالاداعى تاجىريبەمەن ءبولىسىپ, سونداي-اق ونەركاسىپ, ءبىلىم مەن مادەنيەتتى دە قامتۋعا تىرىسامىز. 25 قازان كۇنى استانادا وتەتىن ونەركاسىپتى تسيفرلاندىرۋعا ارنالعان فورۋمعا فرانتسۋز كاسىپورىندارىنىڭ وكىلدەرى جانە بىلىكتى ساراپشىلار كەلەدى. سول كەزدە جاڭا جوبالار قولعا الىنادى دەپ ۇمىتتەنەمىز. ەكىنشى باعىت - ءبىلىم. فرانتسيادا تسيفرلىق ءبىلىم جاقسى دامىعان. ماسەلەن بىزدە انيماتسيالىق فيلمدەرگە ۇيرەتەتىن 75 مەكتەپ بار. ال ءۇشىنشى باعىت مادەنيەت سالاسى بويىنشا ءبىراز شارالار ۆيرتۋالدى تۇردە كورسەتىلەدى», دەيدى ف.مارتينە.
«تسيفرلىق كۇز - 2018» ماۋسىمى اياسىندا تسيفرلىق دامۋ تاقىرىبىندا بارلىعى ون شاقتى مادەني شارا وتكىزۋ جوسپارلانىپ وتىر. باعدارلاما اياسىندا فرانتسۋز ارتىستەرى قازاقستان ستۋدەنتتەرى مەن ارتىستەرىمەن شىعارماشىلىق شەبەرلىك سىنىپتار وتكىزىپ, ماماندىرىلعان وقۋ وردالارىندا كەزدەسۋلەر ۇيىمداستىرادى.
ءمادينا جالەلقىزى,
«ەگەمەن قازاقستان»